حمار في بلد العجايب ( إسرائيل وصلاح الدين )

أنا الحمار الذي يعيش في بلد العجائب أري واسمع كل يوم أشياء وبصفتي حمار فهي غريبة بالنسبة لي علشان كده هفضل الحمار اللي عايش في بلد العجايب وهذه هي بداية سلسله مقالاتي حمار في بلد العجايب .

إسرائيل وصلاح الدين

منذ أظافر عمري وأنا جحش صغير كنت أتعلم بان العدو الأساسي لنا هو إسرائيل ولكن عندما كبرت وأصبحت حمار كبير اكتشفت بان إسرائيل حلوة مش وحشه وكمان هتعمل تحالف العربي الإسرائيلي لمواجهه الإرهاب شفت العجب لما كنت جحش صغير كانوا بيعلمونا غلط ولما كبرت وبقيت حمار كبير عرفت أن إسرائيل مع العرب والدنيا بيس عادي طب وبالنسبة لحرب 73  في الآخر طلعت فوتو شوب.

وكمان لما كنت جحش صغير علموني بان صلاح الدين الأيوبي حرر القدس وانه ملقب بالناصر صلاح الدين الذي حارب الجيوش الصليبية وحرر القدس وكمان يوسف شاهين عمل فيلم الناصر صلاح الدين وكنت بتفرج عليه وأنا رافع راسي فوق عن بطولات صلاح الدين ولما كبرت وبقيت حمار كبير قالوا بقي أن صلاح الدين الأيوبي كان أحقر شخصيه في التاريخ كانوا بيعلموني غلط وأنا جحش صغير وبيفرجوني علي أفلام تاريخيه مزوره .

شفتم عجب العجاب إسرائيل تطلع حلوة والأنظمة الماضية كانت بتحاربها علشان كده كانت بتشوه صورتها وصلاح الدين طلع حقير ضاعت فلوسك يا آسيا أنت ويوسف شاهين وكمان احمد مظهر كان بيضحك علينا هو وصلاح ذو الفقار مش عارف أقول أيه ولا أعيد إيه لما اسمع واري عجب العجاب وكل ده ليه علشان ماما أمريكا متزعلش منا وكمان علشان حاجة مهمة جدا عارفينها أيه .......... ؟؟؟؟؟  .

وبما أني حمار فانا أقولها وبالفم المليان إسرائيل هي العدو الوحيد لنا وصلاح الدين الأيوبي هو أعظم شخصيه في التاريخ حرر القدس وضرب الجيوش الصليبية علي قفاها واللي مش عاجبه يشرب من البحر أو ممكن أبعت ليه حزمة برسيم من عندي علشان يبقي حمار زى أنا  .

بقلم

اشرف طلبه

المحامي