حمار في بلد العجايب ( شهر رمضان بدون موائد وتراويح 2017 )

حمار في بلد العجايب

أنا الحمار الذي يعيش في بلد العجائب أري واسمع كل يوم أشياء وبصفتي حمار فهي غريبة بالنسبة لي علشان كده هفضل الحمار اللي عايش في بلد العجايب وهذه هي بداية سلسله مقالاتي حمار في بلد العجايب .

شهر رمضان بدون موائد وتراويح 2017

منذ نعومه أظافري وأنا جحش صغير كنت اسعد كثيرا بشهر رمضان علشان الشهر ده كان ليه بهجة كنا نقوم بتعليق الزينة والأنوار في الشوارع كنا نعد مائدة الرحمن كنا نسمع أغاني رمضان الجميلة وعند أذان المغرب كان الناس جميعا تقوم بالإفطار ثم نقوم بتشغيل الأنوار في الشوارع ونستمتع بصوت صلاه العشاء والتراويح وعندما كنت تسير في أي شارع من شوارع مصر تسمع صوت صلاه التراويح الجميلة وتشعر حقا ببهجة الشهر الكريم وكنا نلعب في الشوارع وكنا نقوم بعمل دورات رمضانيه لكرة القدم  وتمر الأيام ونذهب لشراء لبس العيد ثم نقوم بمساعدة أهلينا في عمل الكحك والبسكويت وكنا نقوم بحمل الصواني والذهاب إلي الفرن لخبز الكحك والقراقيش والبسكويت فكانت أيام جميله .

وبعد أن كبرت وأصبحت حمار كبير كانت هناك أيضا بهجة لشهر رمضان ولكن في عام 2017 بدأت الحكومة تصدر قرارات ومنها منع صلاه التراويح في الميكرفون علي أساس أن في طلاب ثانوية عامة ومرضي يا راجل دا علي أساس أننا كنا فاشلة زمان ومكنش فيه تعليم ولا مدارس والعلم الآن بقي متطور جدا ومكنش فيه زمان ناس مرضي ولا علشان دا اتجاه للعلمانية ومحاوله طمس الإسلام عموما أنا زرت بلاد كثيرة في شهر رمضان ومنها السعودية ورمضان هناك في قمة الروحانية ولكن شعرت وأنا في الخارج بان رمضان ليس له مذاق إلا في مصر فقط .

والأغرب كمان صدور قرارات بالحصول علي إذن لعمل مائدة رمضان من جهات رسميه ليه هو الواحد لما بيحب يعمل ثواب مع الله محتاج أذن من الدولة طول عمر المصريين بيعملوا موائد رحمن علشان في ناس كتير جدا فقرا بيروحوا موائد الرحمن دا حتى اسم الموائد موائد الرحمن يعني موائد لله عاوزين تعملوا تصاريح ليها ولا الغرض هو التضييق علي الناس وعدم وجود موائد للرحمن للفقراء .

عموما وبما أني حمار كبير أحب أقول للحكومة حاجة رمضان ده بالذات هتلاقي ناس كتيره عامله موائد رحمن في كل شارع ورحوا لفوا وكمان هتلاقوا صلاه التراويح بالذات في كل ميكروفونات مصر أصل الشعب ده يا حكومة مينفعش معاه المعاندة في حاجة تمس الله لان شهر رمضان له قدسيه خاصة عند المصريين جميعا وعموما علشان الحكومة تعرف كمان أن هناك أخوة مسيحيين بيصوموا معانا في رمضان والله لان رمضان ده شهر للمسلم والمسيحي هنا في مصر وعموما كل سنه وأنتي طيبه يا حكومة نراكي في قرارات أخري .

بقلم

اشرف طلبه

المحامي